തലയിണ.....

ഒരു തുണിയുടെ ഉറയില്‍ വെണ്‍‌മേഘം പോലുള്ള പഞ്ഞി നിറച്ച്,അതിനൊരു നീല കുപ്പായവും ധരിപ്പിച്ച് തലക്കടിയില്‍ വെച്ച് ഉറങ്ങിയാല്‍..... ആകാശത്തു പറന്നു നടക്കാം.
പൂവിന്‍ ചിത്രത്തലയിണയെങ്കില്‍, രാവിലൊരു പൂവിന്‍ മന്ദസ്മിതത്തില്‍ മയങ്ങിക്കിടക്കാം.!
'ശോ...!ഇപ്പോള്‍ ഊതി വീര്‍പ്പിക്കുന്ന തലയിണകളല്ലേ.. 'ഒരുകാര്യം ചെയ്യുവോ, നിന്റെ സ്വപ്നങ്ങളും പ്രതീക്ഷകളും ഇതിലെക്ക് ഊതി നിറച്ചു തരൂ...... എനിക്കതു തലക്കടിയില്‍ വെക്കാനല്ലാ.... നെഞ്ചോടു ചേര്‍ക്കാനാ...'

"ആഹാ...!നീ എത്ര സുന്ദരമായ് സംസാരിക്കുന്നു...?'എന്നവനൊരു നോട്ടമെറിഞ്ഞപ്പോള്‍, അവള്‍ക്കൊരു നാണം.
"അതേയ്, ഒരു കാര്യം പറയാനുണ്ടേ... നിന്റെ തലയിണ എനിക്കു തരൂ... '
'ന്താ പറയുന്നേ?'എന്നവളൊരതിശയനോട്ടം നോക്കി...
"നീ എനിക്കായ് നല്‍കിയ ചുംബനങ്ങളും എനിക്കായ് ഒഴുക്കിയ കണ്ണീരും പറ്റിപ്പിടിച്ച ആ മയില്‍‌പ്പീലി നിറമുള്ള തലയിണ എനിക്കു തരൂ.. എനിക്കതു കൂട്ടാവട്ടെ..!'

അവളവനോട് കൂടുതല്‍ ചേര്‍ന്നിരുന്ന് ഒന്നുകൂടി നാണിച്ചു..